សិស្សានុសិស្សជាច្រើនពាន់នាក់បានកាន់កាប់អនុវិទ្យាល័យជាច្រើន ហើយបានបិទចរាចរណ៍នៅក្នុងទីក្រុងនៅប្រទេសស៊ីលី ដើម្បីទាមទារកំណែទម្រង់វិស័យអប់រំ។ ក្រុមនគរបាលដែលបំពាក់ដោយឧបករណ៍បង្ក្រាបក្រុមបាតុករបានបណ្ដេញសិស្សានុសិស្សជាច្រើននាក់ចេញពីសាលារៀនមួយចំនួន ប៉ុន្តែយ៉ាងហោចណាស់រហូតមកថ្ងៃម្សិលមិញនេះ សិស្សានុសិស្សនៅតែកាន់កាប់សាលារៀនប្រាំពីរ។
ការទាមទារឲ្យធ្វើការផ្លាស់ប្ដូរវិស័យអប់រំ ដោយក្រុមសិស្សានុសិស្សដែលបាននាំគ្នាធ្វើបាតុកម្មតវ៉ា និងធ្វើពហិការមិនចូលរៀនពេញមួយសប្ដាហ៍នោះ សំខាន់គឺទាមទារឲ្យពិនិត្យនិងរៀបរយប្រព័ន្ធសាលារៀនមួយឡើងវិញ។ សាលារៀននេះត្រូវបានប្រគល់ឲ្យឯកជនគ្រប់គ្រងតាំងពីអំឡុងឆ្នាំ១៩៧៣-៩០ ក្រោមការគ្រប់គ្រងដោយរបបផ្ដាច់ការរបស់ឧត្ដមសេនីយ៍ អ័រហ្គូស្ដូ ពីណូឆែត (Augusto Pinochet)។
បាតុកម្មធំៗជាច្រើន ពីដំបូងឡើយត្រូវបានធ្វើឡើងដោយរំពឹងថា មានការផ្លាស់ប្ដូរទាំងស្រុង ប៉ុន្តែជាងមួយឆ្នាំក្រោយពីបាតុកម្មលើកទី១ សិស្សានុសិស្សមិនច្រើនទេដែលទទួលបានផលប្រយោជន៍ពិតប្រាកដ។ សិស្សានុសិស្សជាច្រើននាក់ដែលចូលរួមធ្វើបាតុកម្មតវ៉ានិយាយថា ប្រពន្ធអប់រំនៅតែមិនប្រសើរ។ គុណភាពអប់រំនៅតាមសាលាសាធារណៈ និងសាកលវិទ្យាល័យឯកជន នៅតែមិនល្អ គ្រូបង្រៀនមិនល្អ ហើយធនាគារផ្ដល់ប្រាក់កម្ចីសម្រាប់អប់រំដែលមានការប្រាក់ខ្ពស់ធ្វើឲ្យប្រជាជនស៊ីលីស្ទើរតែទាំងអស់មិនអាចមានលទ្ធភាពខ្ចីបាន។
រដ្ឋាភិបាលគ្រោងនឹងដំឡើងពន្ធប្រហែល១ពាន់លានដុល្លារសម្រាប់វិស័យអប់រំ ប៉ុន្តែក្រុមសិស្សានុសិស្សដែលចូលរួមធ្វើបាតុកម្មនិយាយថា ប៉ុណ្ណឹងមិនគ្រប់គ្រាន់ទេ។ បេយ័រ (Beyer) បាននិយាយថា រដ្ឋាភិបាលនឹងមិនព្រមធ្វើតាមការទាមរបស់សិស្សានុសិស្សឲ្យមានការអប់រំមិនបង់ប្រាក់នោះទេ ដោយគាត់បានហៅថា នោះជា គោលនយោបាយមិនស្មើភាព ហាក់ដូចជាដើរថយក្រោយ។
កាលពីសប្ដាហ៍កន្លងទៅ ក្រុមនគរបាលបានប្រើបំពង់រថយន្តបាញ់ទឹកដើម្បីបាញ់បំបែក ក្បួនដង្ហែដែលមានសិស្សានុសិស្សចូលរួមរាប់ម៉ឺននាក់ដើម្បីធ្វើបាតុកម្មទាមទារ ដែលនៅពេលនោះមានជនពាក់មុខដុតរថយន្តក្រុងបីគ្រឿង មនុស្ស៧៥នាក់ត្រូវចាប់ខ្លួន ហើយមន្ត្រីនគរបាល៤៩បានទទួលរងរបួស។ រដ្ឋាភិបាលបានថ្កោលទោសមេដឹកនាំសិស្សានុសិស្សដែលបានបណ្ដោយឲ្យធ្វើក្បួនដង្ហែ ដែលត្រូវបានហាមឃាត់ដោយអាជ្ញាធរក្រុង សានទីហ្គោ (Santiago)។
មេដឹកនាំសិស្សានុសិស្សនិយាយថា អាចនឹងមានការផ្លាស់ប្ដូរ តែក្នុងករណីដែលវិស័យឯកជនត្រូវបានគ្រប់គ្រងដោយរដ្ឋ ហើយវិស័យអប់រំលែងឲ្យមានជាក្រុមហ៊ុនរកប្រាក់ចំណេញ។
លោកប្រធានាធិបតី ពីណេរ៉ា (Pinera) បានបដិសេធមិនព្រមធ្វើកំណែទម្រង់ប្រព័ន្ធអប់រំយ៉ាងសំខាន់នោះទេ។ ផ្ទុយទៅវិញ លោកបានស្នើថវិកាជាតិចំនួន១ពាន់លានដុល្លារ សម្រាប់ផ្ដល់អាហារូបករណ៍ថ្មីទៅនិស្សិតរាប់ពាន់នាក់ ព្រមទាំងបានស្នើបញ្ចុះអត្រាការប្រាក់កម្ចីសម្រាប់និស្សិត ពីអត្រាមធ្យម៦%មកត្រឹមតែ២%។ លោក និយាយថា ផែនការ ដែលសភាជាតិបានអនុម័ត និងកំពុងពិភាក្សានៅព្រឹទ្ធសភានោះ នឹងអាចអនុញ្ញាតឲ្យនិស្សិតកាន់ច្រើនមានសង្ឃឹមចូលរៀននៅតាមសាលាដែលល្អបំផុតនៅក្នុងប្រទេសស៊ីលី ព្រមទាំងអាចកាត់បន្ថយបន្ទុកថវិកាលើក្រុមគ្រួសាររបស់សិស្សានុសិស្សផង៕