ទិវាយុវជនអន្តរជាតិ, ថ្ងៃទី១២ ខែសីហា
សារពីលោកអគ្គលេខាធិការអង្គការសហប្រជាជាតិសម្រាប់ឆ្នាំ២០១២
បច្ចុប្បន្ន មានយុវជនច្រើនបំផុតពុំដែលធ្លាប់មានពីមុនមក ហើយភាគច្រើននៃយុវជនទាំងនោះរស់នៅក្នុងបណ្ដាប្រទេសកំពុងអភិវឌ្ឍ។ យុវជនមានសក្ដានុពលខ្លាំងក្នុងការលើកកម្ពស់សុខុមាលភាពក្រុមគ្រួសារទាំងមូល។
ប៉ុន្តែមានយុវជនច្រើនណាស់ រួមទាំងយុវជនដែលទទួលបានការអប់រំខ្ពង់ខ្ពស់ ឬយុវជនដែលមានចំណេះដឹងជ្រៅជ្រះផង ទទួលបានប្រាក់ឈ្នួលទាប ការងារគ្មានអនាគត ហើយមានអត្រាគ្មានការងារធ្វើច្រើន។
វិបត្តិសេដ្ឋកិច្ចពិភពលោកធ្វើឲ្យប៉ះពាល់យុវជនយ៉ាងខ្លាំងបំផុត ហើយមានយុវជនជាច្រើនអស់សង្ឃឹម ឬបាក់ទឹកចិត្តដោយសារភាពអយុត្តិធម៌សង្គមកាន់តែខ្លាំងឡើងៗ។ យុវជនជាច្រើនអស់សង្ឃឹមចំពោះអនាគត និងគ្មានសិទ្ធិចូលរួមក្នុងដំណើរការនយោបាយ សង្គម និងអភិវឌ្ឍន៍ នៅក្នុងប្រទេសរបស់ខ្លួន។ ប្រសិនបើ គ្មានវិធានការជាបន្ទាន់ទេ នោះយើងពិតជាប្រឈមនឹងការបង្កើតឲ្យមាន "ជំនាន់យុវជនដែលពោរពេញដោយក្ដីសង្ឃឹម" ក្នុងការប្រើបញ្ញា និងក្ដីស្រមៃយ៉ាងខ្ជះខ្ជាយបំផុត។
ធ្វើការជាមួយយុវជន និងដើម្បីយុវជនគឺជាអាទិភាពចម្បងមួយក្នុងចំណោមបណ្ដាអាទិភាពធំៗរបស់ខ្ញុំ។ យុវជនជាកម្លាំងពោរពេញដោយអំណាចធ្វើឲ្យមានការផ្លាស់ប្ដូរ។ យុវជនជាភ្នាក់ងារដែលមានគំនិតច្នៃប្រឌិត គំនិតវាងវៃ និងចង់ដឹងចង់ឃើញអ្វីដែលថ្មី មិនថា នៅក្នុងទីសាធារណៈ មិនថានៅលើបណ្ដាញអ៊ីនធើណិត។ តាមរយៈតួនាទីយ៉ាងសំខាន់របស់យុវជន ក្នុងកិច្ចប្រឹងប្រែងដើម្បីទទួលសេរីភាព ប្រជាធិបតេយ្យ និងសមធម៌ ចំពោះការប្រើប្រាស់កម្លាំងយុវជនពិភពលោក ក្នុងការគាំទ្រសន្និសីទអង្គការសហប្រជាជាតិ Rio+20 ស្ដីពីការអភិវឌ្ឍមាននិរន្តរភាព យុវជននៅមិនទាន់បានបង្ហាញសមត្ថភាពនិងបំណងប្រាថ្នារបស់ខ្លួនអស់ពីកម្លាំងកាយដើម្បីកែប្រែប្រវត្តិសាស្ត្រ និងបញ្ឈប់បញ្ហាលំបាកនានាលើពិភពលោកនៅឡើយ។
យុវជនមិនមែនជាអ្នកដែលចេះតែទទួលផលដោយងាយៗនោះទេ ប៉ុន្តែយុវជនជាដៃគូប្រកបដោយសមភាព និងប្រសិទ្ធភាព។ បំណងប្រាថ្នារបស់យុវជនមិនមែនត្រឹមតែមានការងារធ្វើតែប៉ុណ្ណោះទេ។ យុវជនក៏ចង់មានសំឡេង ជាសំឡេងយ៉ាងពិតប្រាកដក្នុងការបង្កើតគោលនយោបាយនានាដែលមានឥទ្ធិពលលើអនាគតរបស់ខ្លួនដែរ។ យើងត្រូវការស្ដាប់យុវជន ហើយត្រូវឲ្យយុវជនចូលរួម។ យើងត្រូវការបង្កើតយន្តការរឹងមាំឲ្យបានកាន់តែច្រើនសម្រាប់ឲ្យយុវជនចូលរួម។ ឥឡូវនេះដល់ពេលយើងត្រូវបញ្ចូលសំឡេងយុវជនឲ្យកាន់តែមានន័យទៅក្នុងដំណើរការនៃការធ្វើសេចក្ដីសម្រេចនៅគ្រប់លំដាប់ថ្នាក់។
នៅលើពិភពលោក មានការទទួលស្គាល់កាន់តែច្រើនឡើងៗចំពោះតម្រូវការក្នុងការពង្រឹងគោលនយោបាយ និងការវិនិយោគទុននានាដែលត្រូវឲ្យយុវជនចូលរួម។ នៅក្នុងទិវាយុវជនអន្តរជាតិនេះ ខ្ញុំសូមអំពាវនាវទៅរដ្ឋាភិបាលនានា វិស័យឯកជន អង្គការសង្គមស៊ីវិល និងនិស្សិតបញ្ញវន្តមេត្តាបើកឱកាសឲ្យយុវជនចូលរួម និងពង្រឹងភាពជាដៃគូជាមួយបណ្ដាអង្គការដែលដឹកនាំដោយយុវជន។ យុវជនអាចជាអ្នកកំណត់ថា តើយុគសម័យនេះបោះជំហានទៅមុខប្រកបដោយគ្រោះថ្នាក់បំផុត ឬធ្វើឲ្យមានការផ្លាស់ប្ដូរមុខមាត់កាន់តែល្អប្រសើរ។ យើងទាំងអស់គ្នាត្រូវគាំទ្រយុវជនក្នុងពិភពលោករបស់យើង ដើម្បីឲ្យយុវជនវិវឌ្ឍឈានទៅជាមនុស្សពេញវ័យដែលលើកកម្ពស់យុវជនជំនាន់ថ្មីឲ្យក្លាយជាអ្នកដឹកនាំប្រកបដោយគំនិតច្នៃប្រឌិត និងមានអំណាចកាន់តែខ្លាំង៕
បាន គីមូន (Ban Ki-moon)
អានសារនេះជាភាសាអង់គ្លេស។
